نوبات من ينضنك الواحد بدنياته لو يواجه صعوبة يدعي من الله،ومن يتمرض يدعي من الله، والي يسوي ذنب ويريد يمسحه ويصفر عداد الذنوب يدعي من الله، ومن يتمنى الموت لعدوه يدعي من الله، حتى الام من تصير عصبيهَ على وِلدّها لو على رجلها هم تدعي من الله، ومن تهدأ ترجع تدعي من الله ثاني بلكتم ايستجيب لدعائها الأول.
وقائمة الدعاء تتمدد وتطول، حتى صار الدعاء وكأنو مرافق لهواي من عدنا أهل العراق بهذا الوكت وين ما نروح.أبو رياض يگول آني والحمد لله صارلي زمان ما داعي على أحد، ولا داعي لأحد، لكن من أسمع دگات العشاير بالجنوب واليدا تسويه إنرعب، وفد يوم كثر الرعب صعدت للسطح والدنيا چانت تمطر، فتحت زيگي، وشلت إديَّ الاثنين ودعيت بصوت عالي:ربي بجاه هذا اليوم إلي سخرتهَ خير لغسل الگاع والگلوب،خلصنا من العشاير، إگلبها بالشيوخ، واليمشي وره الشيوخ، وخلي عاليها واطيها.ويگول سمعني جاري سالم فسألني هاي اشعندك ويه الشيوخ فجاوبته:أگلك صايره دايره، كل واحد مسويلهَ دولهَ وعلم وجيش، ومضيف يفصل ويحكم بقضايا ماصخه، نصها بوگ ونصب واحتيال.متگلي بروح أبوك ذوله إشوكت يبطلون من هاي السوالف المكسره، واشوكت يعقلون، العالم وين وصل، وهمه وين رايحين، مو دا يجرون البلد للتهلكه، من الله يهلكم، ويخلصنا منهم.