رمزي اشتره بيت بحي المغرب مساحته ستميّة متر، فلشه وسواه گاع، وبده يبني وبسرعة صعد البناء، تبين مسوي بالنص مجاز عرضه متر ونص، وداير ما دايره ست إبيوت من كل جهة ثلاثة.جيرانه يگول فد يوم وگفت يمه وعماله دا يطبگون الكاشي،باركتله أول مرة، وسألته عن سر هاي السرعة بالبناء بحيث ماكوشهرين وخلص الهيكل، فجاوبني الرجل وبثقة عالية:الرزق يحب الخفية، ومن صرت ميانه وياه سألته:گلي اشلون حَصلتْ على إجازة بناء ببيت واحد دا يصير ستبيوت؟.گال وعلويش أدوّخ نفسي بالاجازة، من بديت أبني إجاني المُراقب الي يفتر بالمنطقة، ابن حسوني الأعور، نافش ريشهَ إنطيتهَ (٧٥)ألف، وبعد ما شوفني وجهه.هذي صورة من صور بغداد والي صار ودا يصير بمناطقها الراقية عشوش مال عصافير، كلمن يبني بكيفه، ياخذ الرصيف بكيفهَ، ويسوي دكاكين ومخازن بكيفه.ضاع التصميم الأساسي للمدينة، وما بعد أحد يحچي بيه، ولا أحديسـأل إشلون راح تكفي الخدمات، ولا أحد يعقل أنو الأمين العام ما يمر بالمناطق، وليش ما يدز غيره يمر عليها، ويسأل الييبنون عدكم إجازة وأشلون تفرزون، واذا هو والوكيل والمدير
خيرين، خلي يحيلون ابن حسوني وأمثاله للقضاء، ويطردوهم من الوظيفهَ، حتى تنضبط حسب الأصول.