فؤاد من الغبشه، وگبل نگلة البريج، گال شفت تاليها حكموه.يمعود منو هذا الي حكموه، مو انت تدري كلش زين، عدنه آلاف الحرامية والمتجاوزين والفاسدين، وآلاف القضايا تنتظر الدورمالها، حتى يحكمون بيها.گال: لا تروح بعيد، أقصد نائب الأمين العام السابق لوزارة الدفاع، تتذكره مو.اشلون ما أتذكره، وأتذكر كانت عنده هواي سوالف ومكسرات،عاد ياهي منهن هاي الي حكموه عليها.حسب ما يگولون والخطية برگبتهم، أكو عقد بين الوزارة وبينشركة أجنبية، لتجهيزها بـ(١٠٠) سيارة لاند كروزر و(٤٠٠)سيارة اسعاف، ويا دوب الشركة سَلِمتْ (٢٧) سيارة اسعاف صرفوا المبلغ كله (٢٦) مليون دولار وكسور، وبموافقة السيدالنائب، وراحت على الوزارة فلوسها وما قبضت السيارات.تريد الصدگ ما تخش بالعقل، ومع هذا إشگد حكموه.سنة سجن.والله يابه زين ملايين الدولارات، وأكيد حصته منها ملايين تفض بسنة سجن، وأكيد السجن راح يصير خمس نجوم، هذا اذا ماطلعوه بعفو خاص، شفت ماكو أعدل من هاي العدالة، لا وفوگاها
تگول المحكمة من حق الوزارة تطالبه بالمبلغ، هواي ر اح تحصل فليساتها، ولو هنه ينحسبن تفاليس بعالم سرقات هذا الوكت الي وصلت مليارات.. ويا محلى العدل بعون الله.