إيران مدري اشبيها، أشو فقدوا المسؤولين مالها توازنهم، لمن رئيس مجلس الوزراء العراقي راح بزيارة لأمريكا. وكلائهم هنا يطلعون يخيطون ويخربطون، واحد يريد يضرب ترامب راشديات، وآخر يخصص عشر ملايين لقتله، والعاقل الي بيهم بخطبته ونكاية برئيس حكومته يگول إحنه ويه إيران، هسه منو لازمك روح ويه إيران بس تره لحم اچتافك من خير العراق. وهمه هناك يتصرفون وكأن العراق تابع الهم، وجزء من دولتهم، والختيار الي بيهم السيد ولايتي مستشار المرشد يعتب حيل على الزيارة، والقائم بالزيارة، وتوقيت الزيارة، لأنها حصلت بعد التشييع، وكأنه يريد العراق يبقى يلطم سنة كلما يتوفى مسؤول إيراني، وفوگاها بمقال ينشره، يقلل من قيمة رئيس الوزراء العراقي ويگول شاب ما عنده خبره:مو انتم أهل الخبرة صارلكم تحكمون سبعة وأربعين سنة جره وحده، وتاليها دمرتوا لبنان، ولصتوا سوريا، وأذيتوا العراق، وجريتوا بلدكم لحرب تقودوها بطريقة غريبة حقودة، أمريكا وإسرائيل تضربكم منا، وانتم تندارون على دول الخليج العربية وتبيسون بيهم منا. هي هاي الخبرة الي تريدوها دمار أمة، وتخلف حضارة، واستعداء جيران وگفوا وياكم كل هاي السنين. نصيحة لله بالله عوفوا العراقيين بحالهم، تره من يضوجون يرجعون يدورون دفاتر عتيگة، ويتذكرون أجدادهم اشچان يگولون على أجدادكم من يجون للزيارة!!!