صدگ شي ميشبه شي:أشو منا بعد ما يجوز أحد يخلي صور رئيس الوزراء والوزراء بالمكاتب، وبعد ما فات على الأمر أو التوجيه أو التبليغ يومين،وإذا تطلع موجة أغاني، وأناشيد وهوسات ودمبكچيات، تثير العجب بكلماتها ولحنها وانتشارها.وگلنه هم ميخالف، يجوز هورمون اللواگة اشتغل عند البعض وگبوا فد گبه، مبادرة منهم بلكت يتقربون خطوة من السراي،ويسترزقون من باب رزق ما إنسدت بهذا البلد فد يوم.لكن مال يطلع فنان كبير مثل حاتم العراقي، ويصدح بصوته القوي (حبيبي گلوبنه انت .... وفوت علكلفات يا ساس الفخر).مو معقولة حاتم هم چان واگف بصف (اللوگة) يريد يتقرب، لأن الناس بوضعه هي تريد تتقربله.ولا معقولة ماد إيده وياهم حتى يسترزق لأن الرجل داگ أساسبره البلد وهيچ رزق مو يمه.والمعقول بهذا الطوفان غير المعقول هو:أحد متعني لحاتم ومشيمه حتى يغني للسيد الرئيس.لو جايه تكليف، بفرمان مثل ذيچ الفرمانات الي كانت تجي للفنانين حتى يغنون للقادسية.وأي من هاي الاحتمالات هو المعقول فمعناتها:وصلنه مرحلة واحد يضحك على الثاني!!!