أگول يا جماعة تره يمكن خبطت علينه، وبعد ما دا نعرف الصدگ من الكذب بمسألة تأجيل منح الثقة لحكومة المرشح السيد الزيدي ومنو الي وَگّفْ فارگونات القطار الي كان ماشي بسرعة لإقرار التشكيل وحلف اليمين هل هو:السيد القآني، وجيّته أشو مو ضابطه لأن لو جاي معقوله جيته تبقى گزلي وجماعة الاطار نصهم مدوبلين ويه هذوله أو ذولاك وواجبهم الرئيسي كتابة التقارير عن كلمن يطب أو يطلع!ومعقوله يكلف نفسه ويجي كل هاي المسافة بالبر والامريكان خالين صورته بكل الكومبيوترات. خو يفضها بالتلفون ويا مافض أمور أكبر منها بإشارة من اصبعها الزغيّر مثل ما يگولون.لو هو خلاف أهل الاطار على تقاسم الوزارات والمناصب كمغانم انتصار بحرب الانتخابات لهاي الدورة، وهم مو كلش ضابطه لأن خلاف بسيط على وصخ الدنيا ما يخلي تقاة هذه الدنيا يأجلون مشروع كبير لحل مشاكل الدنيا. خو يسوون وزارات ومناصب فصال على كل أهل الاطار ويفضونا، علويش هذا التأخير وارزاق الناس واگفه؟ ومع هذا جواد يگول لازم تصفه، ولازم يجي يوم قآني ما يطب الا بڤيزة، ولازم الجماعة يتوبون ويرجعون للتقوى وعبادة الواحد الأحد!!!