عباس كظماوي على گد حاله كان عامل بالبلدية، وطلع تقاعد فگاضي كل وقته بالگهوة بمنطقة الشوصة، وبگعدة البارحة قبل صلاة الظهر راح ويّه الربع يناقشون تكليف السيد الزيدي لتشكيل الحكومة، وتدرون إحنه بطبعنه متعودين كل واحد ينطي رأي،وماكو رأي يشبه رأي. فدگ عباس بايده على الماصة وگال:يا جماعة انتو ليش متعجبين واحد يگول زغيّر بالعمر: وشنويعني اسامه بن زيد جوه العشرين وقاد جيش المسلمين، والثقفي١٧ سنة وحقق أكبر الانتصارات، ومستشار النمسا كورتس ٣١سنة، وسانا مارين رئيسة وزراء فلندا ٣٤ سنة، ومحمد بن سلمان بأول الثلاثينات من بده، وغيّر وجه السعودية.وآخر ينق على الشهادة: ليش هي الشهادات بالعراق بعد ٢٠٠٣تنحسب شهادات؟ ثم هو الرجل عنده جامعة وينطي شهادات.وواحد يلح على الخبرة السياسية: هو شغل السياسة بهذا الوكت همتسموه خبرة؟ أشو بنچرچي گبل يصير وزير، ومطيرچي على طول يصير قائد.وآخر ثبرنه منين جاب هاي الفلوس، وهو يدري المال السايب حلال، والشاطر الي يجمعه بالحلال.صفن عباس اشوية وكمل:كل الي گلتوه بچفه، ولزمة السبحة الي ما يهدها من إيده، حتى منيستلم مرسوم التكليف، ويصافح فخامة الرئيس بچفه.شتحطلها وتطيب؟؟