منين نبدي ووين ننتهي، بعد ما وصلنا بهذا الزمان حد ما دانْلَحِگْ نتابع بلاوينا:عملية سياسية وحكومات وبرلمان تْطَلِعنا من بلوة وتذبنا ببلوة أكبر منها وبعد أنگس.حمدي ماخذ إجازة أم الخمس سنين، وگاعد بالبيت خدچي يتابع بلاوي البلاد والعباد، يگول:أكبر بلوة ابتلينا بيها من قامت الدولة ولليوم هي الاستحمار، ومن سئلوه هاي شنهي النوب، رد عليهم:
من نائب، يْطلَع بلقاء واثق من نفسه ويگول أمريكا تسرق الغيوم من على العراق وتركيا وإيران، هاي شتسموها غير حمار لوغيةيعني إستحمار.ومن نائب يصرح هو بنفسه راح يفجر الانبوب المقترح لنقل النفط العراقي الى ميناء العقبة لتجاوز مشاكل مضيق هرمز والحكومة تسكت عنه إشتعني غير إستحمار.ومن چايچي القائد يصير قائد، وأبو الزيتوني يلبس عمامة،ومعادلة سبعة بسبعة تصير الأساس، وغيرها كثير... معناتها الاستحمار صار بلوة.ومن رجعوا سئلوه وتالي؟گال الله الوالي.وبعدها صفن اشوية، وكمل:الشغلة يمكم، أخاف أحچيها وتزعلون؟