إذا بس المقاولين العراقيين يطلبون الدولة ثلاثين ترليون دينار،لعد:ديون البنك المركزي اشگد؟ديون المصارف الحكومية والأهلية اشگد؟ديون صناديق التقاعد والضمان الاجتماعي اشگد؟والسندات والحوالات وغيرها.وإهنا وبهذا الصدد، المتابعين يقدروها أكثر من تسعين ترليون،ويقدرون الدين الخارجي بحدود سبعين ترليون، وإذا تحوّلنْ للدولار يصير كل الدين مالنا الداخلي والخارجي بحدود (١١٥)مليار دولار.أكثر أو أقل إشويّة، إذا تقسم على روسنا كلنا كعراقيين، يطلع كلنفر من عدنا حتى الي بالگماط مديون بحدود (٢٥٠٠) دولار.وبما أنه إحنه ما إلنا لازم بالديون الي زادت حسب الحچي بسبب الفساد، وسوء الإدارة، وغياب التقدير الصحيح، لكن مجردالشعور بان الواحد من عدنا مديون هو شعور مزعج. والأزعج هو:الحكومة بهاي السنة سوت هواي مشاريع كنوع من الدعاية الانتخابية، وعافتها على النص بعد ما خلصت الانتخابات.وهاي كلف وفلوس راح تنضاف فوگ ذيچ الديون غير الازعاج مال الشوارع والأرصفة الي بقت ما كامله، ولا راح تكمل بالقريب.سيد صادق يسأل زين إحنه شنو ذنبنا؟ يجاوبه كمال:ذنبنا إحنا الى انتخبناهم، وإحنا الي ساكتين عنهم.