ما أدري اشعجب بذيچ السنة إتفقوا بيها علماء، ومراجع السنةوالشيعة الأجلاء على يوم واحد يبدي بيه العيد، لأنهم بكل هاي السنين الي عشناها من عمرنه ما اتفقوا فد يوم، ولا توافقوا بيه على بداية وحدة لا للعيد، ولا للصوم، ولا لغير شي، ما ندري بذيچ السنة:عبالك الگمر الشيعي توافق ويه أخوه الگمر السني حتى يطلعون سويّة بنفس الوقت وبالمضبوط.المهم بالنسبة النه هذا شي عظيم، وبمناسبته ما عدنه غير نگول:الله يهدي الكبار بالدين والدولة حتى يتوحدون بكلشي، لأن منهمه يتوحدون فالشعب راح يتوحد من كِيفهَ ويبَطِلْ فرقة،واختلاف، وگوامة وعركات. وكل الي نتمناه بمثل هيچ مناسبات:أن يعيشون أهلنهَ بالعراق بأمان، ووياها دعوة من رب العالمين أن يحَنِنْ علينه عباده الكبار من رجال الدين إلي خلّوا نفسهم وكلاء إله بهاي الدنيا، بلكت يعوفونهَ بحالنهَ.لا يخششون نفسهم بالسياسة، وبالزغيرة والچبيره.لا يوّزُون الزغار من جوة ليجوه ويدفعوهم باتجاه الطائفية.لأن الدنيا يا أمة محمد تَغيرت هواي ودا تركض باتجاه المزيد من التغير الي صعب نلحگ بيه.
ولأن أرواحنا تعبت وما عاد تتحمل كل هاي الاختلافات المصطنعة، الله يهديكم علينا، ويهدينا عليكم.