بهاي الايام ما عدنه شغل وعمل غير نحچي بالانتخابات، والكتل والبرلمان، فواحد گال والله ملينّهَ، لو عليَّ ما أريد من البرلمان الجاي غير يشرّع النه قانون واحد هو من أين لك هذا، فسألوه الگاعدين، عجب؟ فگال شوفوا العراق دخل بدوامة فساد ماصايرهَ ولا دايرهَ أبد، ولا الها حل إلا بهيچ قانون، يتابعنا كلنه ويسألنا عن مدخولاتنا كلنا، لأن مثل ما تشوفون: تراجع دائرة داتسوي شغله تنطي للموظف رشوه، والراشي والمرتشي فاسدين.شرطي مرور ما يسجلك مخالفة بس ينطيه المقسوم فأنت وياه فاسدين. معلم يعَبُر أسئلة الامتحان، هو والطالب فاسدين. طبيب يتفق ويّه الصيدلية، فهو والصيدلي فاسدين. أبو الگمرگ بالحدوديأخذ منك ومن غيرك حتى يعبر البضاعة فانت وهو وغيرك مفاسدين. تاجر يجيب بضاعته من الصين ما مطابقة، فهو وأبو
التقييس والسيطرة والتجارة فاسدين. ضابط ياخذ راتب الجندي فهو والجندي فاسدين. فلاح يحط المخضر الزين بالواجهة هو وأبو العلوة والوسيط فاسدين. مراقب البلدية يغلّسْ عن التجاوز،هو والمتجاوز والمختار فاسدين. قاضي يغيّر الإفادة، هو والمتهم فاسدين. خدامة تبوگك أهل البيت هي وأهلها مهما كانوا محتاجين فاسدين. وزير يحيل المقاولة عن طريق حزبه، هو وقيادة حزبه وجماهير الحزب فاسدين. حكومة تحيل مشاريعها بالتنفيذ المباشر وبأضعاف الأسعار السائدة بالسوق فاسدة. ضرب بجمع الي ينطي والي ياخذ فاسدين، وأكثر القوم فاسدين، عقدة ما يحلها حتى الحمزة أبو حزامين. فسألوه لعد القانون اشلون يحلها؟فمن شاف الحرج. گال: بلكت.