صبري إتصل بالتلفون من الغبشة ويگول:والله العظيم بقيت أباوع دقائق بوجوه رؤساء الدول العربية والإسلامية، وممثليها الي حضروا اجتماع ترامب عن غزة، ومن كل عقلي بقيت أدور على العراق أشو لا رئيس ولا وزير.وبيني وبينكم هو اجتماع ترامب، ولو يشبه الاجتماع الحزبي،والي بيه الحاضرين بس يهزون روسهم، لكن من صدگ ضجت،گلت:بله عليكم هاي تاليها بلدنا هذا لا حاسبيه على العرب الي جايين فازعين، ولا معتبريه من بين المسلمين، الي يمشون ويه الماشين.توقف اشويه بالحچي وكمل مو بس هاي.فسألته ها ليش بعد إشخليت؟ ضحك وگال لا بعد اسمعني للآخر:بعد ذيچ الأخبار الي تضوج إجا الخبر الآخر الي يضوج أكثر.يمعود شنو؟تدري ضجت أكثر من شفت تشكيلة الوفد العراقي لحضور اجتماعات الأمم المتحدة، لأن ما بيها توازن، وفوگاها داحسين واحد ومگعديه بالصف الأمامي وهو لا يشتغل بالدولة، ولامحسوب عليها بالمشاعر.
وبيني وبينك من سمعت كلمة العراق الي القاها السيد الرئيس بالجمعية كلها صفنات، وتوقفات، وعثرات مو بس ضجت، گلتويه نفسي:حقه ترامب ما يعزمنا بهيچ گعدات، ولا بأي گعدات يمكن چان خايف لا نصفن بالحچي، ونتيّه عليه القصد من الگعدة ومن الحچي.