حرنّه بعد بيمن نصدگ من يطلع رجل معتبر يبين مسؤول حكومي أو في طريقه الى أن يكون مسؤول ويگول:ديالى باشرت تسويق الاف الاطنان من الحنطة، والكوت هم مباشره قبلهم بتسويق ألاف أخرى من الحنطة، وكركوك والموصل على الخط دا يباشرون بتسويق آلاف الأطنان من الحنطة... مباشرات مستمرة لملايين الأطنان من الحنطة، ويگول حنطتنه أحسن حنطة، لا بيها دوسر، ولا خالطيها تراب، گول يخلي الواحد يتخيل ويگول:لعد احنه بخير وراح نرجع مثل گبل نكتفي من الحبوب، وراح نصدر، وننطي رشاوي لبعض الدول حنطة.وبعدك توّك تريد تمخمخها براسك گبل ما تنام يطلعلك واحد مبين مالي ايده وواثق من نفسه، لازم كومة وثائق وخطط تسويق،وسندات ملكية من الطابو ويگلك:
تره أكو جماعة مسوقين ست آلاف طن حنطة عالية الجودة منقطعة أرض سكنية ببغداد خمسمية متر، وقابضين فلوس مليارات الدنانير.بعدها تدوخ وتجي ببالك الف حسبه.وحتى واحد لا يدوخ ويحير إلمن يصدك يتذكر سرقة القرن،والعفو، ويذبها على الله، ويروح ينام.وگبل ما يغفى ويبقى حاير عليه أن يكرر ويّه نفسه خمس مرات"الله لا يحيّر عبده"!. شوفوا اشلون راح ينام رغد.