شايفين الواحد الي عنده جهال اثنين قريبين بالعمر، اشلون يدوخ من ينطي الى واحد فد شي مثل چكليته، لازم ينطي للثاني مثلها.ومن يشتري ملابس لازم يشتريها نفس الشكل، والا يبقى واحديون براسه.وإذا عنده أكثر من طفل هاي الي الله كاتبها عليه، لأن يگضي نص وكته يرضي هذا، ولا يزعل ذاك.هسه عاد ولا البرلمان مالنا الـي عدد أعضائه(٣٢٩) نفر إشراح يرضيهم بعد ما انطوا للاكراد حلبچة محافظة رابعة، وهي في الواقع مساحة وعدد سكان وموقع وتاريخ مستحقه من زمان.لأن الي دا نشوفه أثناء وبعد التصويت:أصوات گبت بزعل مثل سالفة الچكليته.قسم يريدون يسوون الزبير محافظة.وقسم يسعون الى أن يسوون المسيب محافظة.وأطراف أخرى طرحت أقضية بالموصل بيها شيعة يردون كل واحد منها يصير محافظة.وكلهم الي يريدون ما گعدوا بيناتهم وبدوا يحسبون الإمكانيات،والموارد، والسكان والحدود والجدوى.
بله عليكم هاي اشلون الرئاسة راح ترضيهم، بهذا الوكت الصعب، وبطبيعة الواحد منهم الي ما يرضى حتى لو تجيبله لبن العصفور. ،زين معقولة مثلا نرجع لأيام الطفولة ونجيب الهم چيس چكليت ونفتر عليهم.