طلع السيد محافظ كربلاء بمقابلة تلفزيونية كاشخ وأفندي يم كنلابس ملابس العيد وبده يحچي عن الإدارة والمدينة وتاريخها
وأهمية الزيارات الاربعينية وختهما بعبارة عن قناعة مقتنع بيها،وبالضبط عنها گال:ان الامام الحجة عجل الله فرجه الشريف هو الي يدير الزيارةالاربعينية بكربلاء، لأن كل احنه الموجودين لو ما هو ما نگدرندير الزيارة، وما اكتفى بحچيه هذا أو قناعته راح جاب شاهدعلى هذي القناعة أو المعتقد، وكمل الحچي مالته بعبارة أخرى،گال بيها:إنطيني منطقه بيها أكثر من ٢٥ مليون زائر، خدماتها محددة على مليون ونص، وتصاميم المجاري مالها محددة على مليونين نفر،وما يصير بيها نضح.أبو سلام گاعد ويه جماعته دا يتابع الحچي فعلى طول جاوب منيمه وگال: سيدنا والحسين ابن علي وأخيه العباس أبو فاضل اليانت الله وفقك ودا تدير مدينتهم غيبيا تره كل العقال الي شافوك وسمعوك ما مقتنعين بحچيك. ومو بس ما مقتنعين يگولون:هي بقت على النضح، مو مدنا الجنوبية والوسطى ومن ضمنهاكربلاء دا تنضح من كل مكان، وهذا الي دا تگوله اشلون ماتگوله هو:تشكيك بالمعتقدات الإسلامية.تخدير لعقول الناس وتجهيل الهم.دفع العالم حتى يباوعنه بعيون زغيّره.وختم أبو سلام حچيّه بالمثل الي يگول: جهل الحاكم خراب البلاد.