السيد محافظ البنگ المركزي مالنا يصرح وبتصريحه يتكل على الله ويگول:"العراق أصبح واحد من أفضل دول العالم في السيطرة على بيع الدولار". هسه الرجل لو گادر يْرَجعْ سعر الدينار للدولار مثل ماچان گبل كان گلنه والله يابه بزوده يصرح ولازم يصرح.لو موَگفْ شراء البيتنجان، والبصل، والفسنجون من الجيران بملايين الدولارات كان گلنه حقه يصرح، وعفيه عليه يصرح.
لو مسوي صرفة للمواطن الي يسافر بره يروح بيها بزوده الىأي بنگ قريب من عنده أو الى مكاتب من مكاتب الصرافةالرسمية الي على طريقه، وبدقيقتين يصرف المبلغ المسموح اخذه وياه لأغراض السفر، كان گلنه هذا الشغل المعدل والي صاحبةلازم يصرح.لو فارك حلگ أصحاب البنوگ الي تهرّبْ العملة لإيران ولبنان مو ينتظر الامريكان يفركوها ويذلونا بفركتها كان مو بس گلنه حقه يصرح، يمكن نطلع كليتنا نصفگ لتصريحه.أشو كلهن ذني ما صارن، ولا وحده منهم تحققت، اشلون صارأفضل، وبفضل من صار أفضل؟وختاما خلونا نتوجه الى الله سبحانه وتعالى، ونتضرع اليه،وندعوه دعوة صادقة، بلكت يرحمنا برحمته الواسعة، ويخلي دولتنا العليّة تعمل بالمثل العراقي الدارج من قبل تأسيس الدولةوالي يگول:إنطي الخبز لخبازته.