من يگلولهم يابه من تحاربون وتكاونون، إحسبوا حساب اليعدكم من قدرات، والي عدهم، وشوفوا الوقت المناسب، والي مومناسب لضربهم، وخلوا ببالكم الوضع السياسي، ومواقف الدولالي حواليكم، والقدرة على أذية العدو، وقوتكم على تحمل أذيته.يطلع رجل دين سيد منشنش، جلده ناعم، عمره ما شايف شمس،ولا طالع للشغل، ولا داگ بسمار بحايط بإديه الترفه، يگول:إي ندري العدو متفوق علينا تكنلوجيًا، لكن الله ويانا.ونعم بالله، إشلون ويانا، وكل هذا الدمار، والخسائر، والإذلال،والتلاعب بغزة، وقادة العرب والإسلام الي حطهم العدو بسوق المزاد الرخيص، ما يگدرون يسوون شي.ومن يطلع واحد من الاطار الي يدير الدولة العليّة يگول لأهل الإطار تره سياستكم بالتوظيف الي ترست دوائر الدولة،ومؤسساتها بموظفين زيادة على الملاك راح تسبب بإنهاير الاقتصاد، وراح تلگون نفسكم حايرين برواتبهم أول ما تنزل أسعار النفط ويجوز يگبون عليكم.يرد چبيرهم الي عمره ما قاري صفحة بكتاب اقتصاد، ولامشتغل كاتب بدوائر الإدارة والمال، ويگول: الله كريم.لا اله الا الله، قابل الله سبحانه وتعالى يدندل الكم فلوس بزنبيل.عمي ارجعوا على أجدادكم واسمعوا شچانوا يگولون حول هذه المواضيع:إتكل على زادك، ولا تتكل على مرادك.