موظف بمطار بغداد الدولي يگول انخبصنه، ومن سألنه يابهَ شكو؟ گلولنه السيد المدير يريد يصرح، فگلنه بيناتنا خلي يصَرِحْ من و لازمه، أشو كل الي حصلناه من العهد الجديد سوولنا البلد حارة كلمن إيدو إلو، كلمن يريد يصرح بيها يصرح بدون وجع گلب.فسالم موظف قديم بين الگاعدين گال لا يابه لا، يبيّنْ عنده تصريح مهم فاسكتوا، وبدل ما نسكت رحنه نخمن:واحد گال يمكن رجعت طياراتنا تطير فوق أوربا.وواحد گال يجوز فاتحين خط طيران لأمريكيا، واليابان، والطائر الأخضر بأجواء الكفرة گام يهفهف مثل گبل وأحسن.والثالث گال اعتقد مرجعين التخفيض بسعر التذاكر للموظف والمتقاعد والشباب مثل گبل.والرابع گال علويش مستعجلين انتظروا خلونه نشوف.
والأخ قبل الظهر صرح وگال:(قمنا بتأهيل المرافق الصحية في المطار، وأصبحت من بين الأفضل في مطارات العالم).والحقيقة بعد ما سمعنه التصريح بهتنه، ومن حلات روحنا گلنه معقوله، صار عدنه تصليح التواليت منجز.ومعقوله نفتخر بتواليتات بمطار ما يتقارن بالمطارات الداخلية بدول العالم.ومعقولة نبقى زغار ونريد البلد يكبر!!