سيادة الرئيس انت بعظمة لسانگ قبل حوالي الشهر گلت وبحيل صدر: اشلون نشرّعْ قانون والمدونة مالته ما موجودة؟وأكيد تقصد قانون الأحوال الشخصية، لأن هو الي الجماعة رادوا يشرعوه بطريقة سلگ البيض غصبا على الي يرضه، أو الي مايرضه، وگالوا عود بعيدين نكتب المدونة!الناس وبعد التشريع في هذا الزمن البديع تسأل لعد اشلون غيرت رأيك؟وليش ما التزمت بموقفك الي گلته بالأول؟وكيف حطيته ويه قوانين أخرى بسلة وحده، وخضيته خضه وحده، وطلعته مشرعن وجاهز مره وحده؟تدري سيادة الرئيس هواي من ذوله الناس المساكين، ولي بعدهم ما صحوا من صدمة الليش، دخلوا بصدمة الكيف، يقصدون الطريقة الي شرّعتْ بيها القوانين الثلاثة بعد ما طلعوا برلمانيين،ومدونين، وحچوا هواي عن هاي الطريقة الكارتونية، وگالوا:تره السيد الرئيس الله يطول بعمرة أخذ وكت بين عرض القانون(الأسباب الموجية) وبين دگة الچاكوچ للإعلان عن الموافقة ستثواني، ويگولون تره بهاي الست ثواني حتى لو يگدر يسخر رئيس الجان بزره، ويجيبه تحت ايده هم ما يلحگ يحسب الأياديالي إنشالت ليفوگ، عن الأخرى الي سبّلتْ ليجوه، وفوگاها هم يگولون بحسره وألم تره هاي السواية إهانة شرعية لعقول العراقيين، وضحك على الذقون.