يگولون الشعب هو الي يقرر شكل النظام، والمرأة تلبس بكيفها،وما يجوز واحد يجبرها على لبس محدد، والبلد لكل أهل البلد ماكو تفرقه بين الطوائف والأقوام، والدين لله والوطن للجميع،والحكم مدني، لا مخابرات، ولا شبيحة، ولا سلاح الا سلاح الدولة.يونس يگول لا تصدگون، وروح ابهاتكم من يتمكنون يرجعون مثل گبل يأمرون وينهون وبالسيف يذبحون، ومن شاف ربعة مايصدگون گاللهم لعد اسمعوا هاي القصة:أكو أسد كبر بالعمر وقلت قابليته للصيد، فطلع الصبح يتمصّرْ،ومكشر عبالك دا يضحك، باوعت عليه الحيوانات من بعيد، وگله الثعلب ها أبو خميس أشو اليوم مو على عوايدك طلعت مكشر.گاللهم إي والله اشو گعدت فرحان وعاجبني أضحك وياكم انتم أهلي وناسي، فما صدگوا بيه وبدوا يتراكضون كل واحد بجهه،الا الغزالة بقت صافنه بضحكته، جرها الثعلب من ايدها وگاللها ولچ اشردي، آني أعرفه زين هاي مو ضحكته.گلتله يمعود دروح، انت أصلا حچاي وجهين.
وراحت تتمشي وياه، سعيدة ومأمنه، الا أن وصلوا حفرة كان حافرها ومغطيها بأغصان أشجار، وگعت بيها الغزالة، مد ايدهالها وگال إنطيني إيدچ دا أطلعك ومن انطته ايدها عضها من زردومها، وقبل ما تطلع روحها گلتله:مو صوچك إنت، صوچي آني الي أمنت بيك، وما سمعت كلام الثعلب، بس بعد الحچي شيفيد.