والله يا جماعة ما ندري شنحچي، وشنگول بعد الانهيار الي صاربسوريا بعشر أيام.سوريا الي عبوّا أدمغتنا بكلام فارغ عنها قلعة العروبة والصمود،سَلَمْ جيشها وحزبها وشبيحتها، ومليشياتها وهمه مصاليخ. ما عدنه غير نگول العرب والمسلمين بأدنى درجات الانحطاط من بداية التاريخ لهذا اليوم: إسرائيل تضربهم راشديات وهمه حتى ما عاد يشگفون، وتركيا تتحرك بأراضيهم ومسوين نفسهم ما يدرون،وايران تخدر بيهم طائفيا وهمه مكيفين، وأمريكا تلعب بيهم طوبه وهمه لا يصدون، ولا يدرون. ومن سنة ٢٠٠٣ والعالم يصيح
ولكم حروب الجيل الخامس غير باقي الحروب، حروب معلومات وتكنلوجيا، وتمردات داخلية، محد يسمع ويشوف، باقين على القديم، وعلى وقائع صدر الإسلام.ولكم اصحوا، طوروا قدراتكم العلمية، لا تظلمون احد من باقي الطوائف والأديان، لا تعيشون وهم الطائفية، لان شفتوها بسوريا،حتى الي راحوا على أساس يدافعون عن المقدسات عافوها وطلعوا بالعزيزة. ابنوا جيش وطني، اصرفوا عليه، رفهوا عنالناس، لا تلتهون بالقضايا الزغيرة تره بناتنا الي نحجبهن حتى لايدخلن النار، بكل بساطة تسولف ويه امريكي بالتلفون طول الليل،وتسوي الي تريد تسويه، لا تزيدون من المحرمات بكيفكم،وتذكروا كل حكم لشخص او حزب او طائفه يطول تكرهه الناس ويحفر گبره بايده.ولو هذا الحچي محچي وما اعتقد يصدگوه، لأن وبكل بساطه يتهمون من يحچي الصدگ طاگيته منگوبه!!