من قرأ كتاب رسمي من دائرة التسجيل العقاري برفع الحجز عن عقارات السيد نور زهير وعائلته، داخ وبقى يفر براسه، وسأل نفسه أول شي هذا الكتاب صدگ لو مزوّر؟ وإذا صدگ معقوله يرفعون الحجز عنه وهو هارب خارج العراق، وما حضر موعد المحكمة. ومن راحت الدوخة منه بعد ما شرب استكان چاي سنگين گام يسأل ربعه القريبين عن السبب:فواحد گله يابه ليش دايخ هو بهذا الزمان كلها طمست بالوحلة وبعد محد يحاسب الغلطان خاصة أبو الفلوس، والي عنده نفوذ سياسي.وآخر گله لا تروح بعيد يجوز رفعوا الحجز حتى تگدر الجهات المعنية بالدولة تبيعها وتسدد المبالغ الي باگها الرجال.وثالث شكوكي حيل وما عنده لحيّه مسرحه، گله آني أعتقد رفعوا الحجز حتى يبيعوهن، وتدري خوش بيهن فلوس، وهاي الفلوس راح تنباگ، والبوگ من البايگ حلال.ورابع وسواسي، مأيّسْ من أن تصير چاره للبلد، گال يا جماعةتره نور زهير دافع الخمس عن أملاكه كلها فصارت حلال،وبهاي الحالة ما يحق لأي واحد يصادرها، ولا يحسبها تعويضات
عن البوگه، وشوفوا اشلون راح ترجع لعائلته كل الأملاك،وفوگاها بوسه.بالله عليكم لو من تصير مثل هيچ مواقف بيها اشكالات،يوضحون للناس ليش هذا الي صار، وشني الأسباب الموجبة، موأحسن ما يخلون الناس دايخه وتغزل بكيفها.