يگول أشو على غفله وآني جاي مستعجل من العامرية دا أروح على موعد ويه طبيب القلب بشارع الكندي بالحارثية، وأول ماوصلت قريب مجسر ساحة النسور لن الازدحام واصل لعنان السماء، وتعلگت سيارتي بالنص بعد ما عندي مجال اروح يمين ولا يسار، ولا أتقهقر للخلف.سلمت أمري الى الله وساعة ونص ياله طلعت من الساحة، طبعا راح علي الموعد ورجعت للبيت، ومن وصلت قريب آذان العشا،رحت أسأل ليش هذا الازدحام وآني قبل ذاك اليوم بيوم فايت بالساحة ماكو هيچ شي.گلي محمد واحد من أصدقائي، حزبي من جماعة الحكومةمضبوط، صايم مصلي، أوثق بيه كلش يگولون:دا يوسعون الشارع.اشلون يوسعوه وهو قبل أيام افتتحوه؟
يگولون من افتتحوه وجربوه إكتشفوا الشوارع مالته ضيگة،وتسوي ازدحام، فراحوا يگصون من الأرصفة ويعرضون الشارع حتى يصير لوز.مو الصينيين الي ماخذين المقاولة يفتهمون عجب يچفصون هيچ يچفصة؟الصينيين شعليهم، غير جماعتنا من حالوا عليهم المقاولة كلش يبيها مكتوب، وبيها مخططات وقياسات، وتدري بيهم همه ملتزمين بالتوجيهات (نفذ ثم ناقش) خوما أخذوا المقاولة على البركة.والله شگلك اذا هذا الحچي الي نسمعه صدگ ومو اشاعات فلوماخذيها للمقاولة على البركة هواي أحسن!