برجوع ترامب للملعب، راح ينگلب شكل اللعب، وتزيد عيار الشدة. الأخوان بديرتنا ما يقبلوها حقيقة، ولا يريدون يتعاملون وياها بما يناسبها من مناورة، وأمس صار نقاش ويه واحد منهم،من گله باسم: شكو بيها تغيروا ويه التغيير اشويه، واطلعوا من الملعب بلا خسارة، فجاوبه:تره انت صدگ فسگان، احنه عدنا أحزاب قويه، وعدنا ملايين مسجلين بيها، مستعدين يدافعون عنها، ويقاتلون ألف سنه. ردعليه: ما أتفق وياك، وما راح أحچيلك على ملايين المتطوعين ويه ذاك النظام الي تبخروا من طبت قوات الاحتلال، راح أسولفلك شغله وحده صارت وياي تثبت الحچي:رحت بعد ٢٠٠٣، وبشهر محرم ازور صديق بالراشدية، ومن وصلته گلي تعال نروح للحسينية نأدي الواجب، گتله يالـه فلكيت اللطامه ما إلك محط رجل بيناتهم حتى الواحد ما يگدر يرفع ايده ليفوگ.المهم كملنه الواجب وطلعنه، وبعد ١٨ سنهَ رجعت زرته وهم بمحرم، شفتهَ إمغلس ميگول خلي نروح نأدي الواجب، فاندگيتبيه وگتله:أبو حسين خلينه نروح للحسينيّة، ومن رحنه لگينه الموجودين أقلمن النص گتلة أگلك شنو السالفه. گال: يمعود الي إجوي يلطم ونگبل چانوا يريدون يسجلون بالاحزاب، ويستفيدون، ولمن سجلو اگعدوا على صفحهَ. وهسه دا ينطون خمس تالاف دينار لكل واحد
يجي يلطم، وما يكمل العدد... فمعقوله ذوله تعتبرهم حزبيين وعدهم استعداد يضحون.رد برهاوة: معقوله ونص لأن تغيروا.