عرفنه مجسر بعده ما دار عليه الحول يخرّ بالمطر... سهله يحشون الفْطُورْ زفت الى أن يخلص برد العجوز وعرازيل اليهودوالله كريم. وعرفنه مجسر يصعد المطر جواه فوگ المتر لأن ماحاسبين تصريف مي المطر... سهله يلمون كل السيارات الحوضية للدولة، ويكثرون عدد النزازيح الى ان تخلص المربعانية، وتنشف الگاع. وعرفنه من يحفرون الشوارع يعوفون التراب والكثويل بالمكان... سهله يكرفه المطر القوي ويخلصهم من همه، والسيارات بمشيها تحوله الى طين يفيد حدايق البيوتبدل ما يجيبون زميج. وعرفنه مجاري مياه المطر كل سنة تنسد وتطوف الشوارع من گد التخسفات وعدم الادامة ونشاط الأهالي
في رمي الزبل بالفتحات... سهله يجوبون عمال من المسطر يشيشون المجاري، ويصرفون المي حتى لو بقوا يشيشون أسابيع.وعرفنه تبليط شارع يگفع بالمطر، وأرصفة يدوس المقرنص بالمطر... سهلة يعيدون الرصف والتبليط، وشركات الأحزاب مستعده، وخير البلد هواي.لكن الي مو سهل ولا نگدر نعرفله أساس بهاي الهوسة والسيارات المغرزة، والتكاتك المسيّسه بمطره وحده، تجيك فاشنستا حلوه ومربربه، تتجاوز كل الشوارع الغرگانه بسيارتها الرباعية،المحمية من الغرگ ربانياً، تدخل الثكنة العسكرية الاستخباريةبالكاظمية، وتفتر دا تدوّر على صديقها النقيب المْسَمْسَمْ وتگول:عافني فجأة الي ما يخاف من الله، وإجيت أريد أعرف ليش؟وليش ما يدزلي ال(١٥) ورقة الي چان يحولها الي كل أسبوع؟عباس يگول هسه ياله عرفت ليش إسرائيل تعرف عنا حتى دبيب النمل الي يمشي بگاعنا!!