بعد حچاية عن الجهل والتجهيل أتصل أستاذ كامل (مدرس متقاعد) وگال:آني ما أتفق ويه الحچي، المجتمع مالنا ما يعاني من جهل، ولاأكو أي تعمد بالتجهيل، والدليل زاد عدد الخريجين، ومعظم الشباب دا يكملون جامعات، وبدل عشر جامعات چانت عدنه هسه أكثر مية جامعة.فكان الجواب تره أستاذ، الجهل الي دا ينحچي عليه ومأخر العراق مو عدم القراءة والكتابة. الجهل أشمل وأوسع يتعلق بنقص المعرفة الصحيحة، والقدرة على إدراك الحقيقة، والفهم الصحيح للدين. رجع يسأل يعني اشلون؟ وكان الجواب:
الطبيب المخدر بمستشفى بالعمارة الي يأخذ إجازة أسبوعين من المستشفى حتى يروح مشي لكربلاء وهو الأخصائي الوحيد بذيچ المستشفى فتتأخر العمليات أو تتحول لغير مدينة، هذا جهل بمهنيةالطبيب وانسانيته. ورجل الدين الي من على المنبر الحسين ييگول: كان الرسول (ص) يركب حمار اسمه عفير، حدثه الحمارعن ابيه قال (ان جدي ركب مع نوح في السفينة فربت نوح على كتف الحمار وقال له سيخرج من صلبك حمار يركبه خير البشر)، هذا جهل وتشويه لصورة الدين الحنيف. الناس الي تطلع تهوس وتدبچ لياهو يجي للسلطة، جهل بفهمهم لدور الحاكم وبطبيعة العلاقة وياه ودفعه باتجاه التسلط والدكتاتورية. البلديةالي تسوي تمثال للرادود ياسين الرميثي وتعوف عشرات المتميزين من أبناء الرميثة والسماوة والعراق، جهل يغرگ الشباب بالطقوس ويحرفهم عن المعرفة العلمية والتطور والتطوير. وبعد... أشو أستاذ كامل من سمع وبعد ما عجبه الحچي، لأن قطع الاتصال حتى في أمان الله ما گال!