هو من الأول يغط، يغط ولازم ينبگ. ومن ينبگ يغيّر الطريق الماشي بيه إذا چان على جهة اليسار يروح على اليمين، وما عنده مانع من ينبگ مره ثالثة يفوت بطريق يرجعه ليوره وين ما غطأول مرة.
وهاي أبد مو هي المشكلة بتاريخ السياسة العراقية العريقة، اليينبگون بيها هواي، والي يستعرضون على الخالي بطال هم هواي، ومشكلتنا الأزلية هي أنو السياسي الي ينبگ لازم يصرح،وذاك اليوم وبعد ما اخترقت الطائرات الإسرائيلية الأجواءالعراقية نبگ واحد كان ساكت من طلع من المنصب الچبير،وعلى طول أول ما طلع صرح وگال:استخدوا اجوائنا، منتهكين دستورنا وسيادتنا وجيرتنا لإيران،ولأن إحنه في حالة حرب وعداء مع الكيان الصهيوني، فتكتسب المقاومة الحقة غطاءا شرعيا، يفتقده الوجود الأجنبي....سيد راهي يگول: لا بالله، شلك بهذا الحچي، لو باقي ساكت مو أحسن:لمن انت بحالة حرب، ليش العدو يستأذنك إذا يريد يخترقك؟ولمن ما تريد تنخرق وبيوم چنت بالسلطة ليش ما بنيت دفاع اتجوية ما تنخرق؟ولمن انت سبع وتحتج، لعد ليش ما فكيت حلگك يوم اغتالوا الامريكان بوكتك مسؤول چبير بالدولة؟عجب من تطلعون من الوظيفة تصيرون سباع، ومن تگعدون على الكرسي، تصيرون أرانب، وختم راهي حچايته:صدگ الي اختشوا ماتوا على گولة المصريين.