شاكر يگول إشعدكم من خَبر، فضايحنهَ وصلت للصين، إليحسبوها أجدادنا، بعيدهَ لمن گالوا إطلب العلم ولو بالصين. ربعناالظاهر ما عدهم بعيد، وعدهم الصين شمرة عصا.المهم وصل وفدنا للصين الي بيه شاكر دا يشترون مكاين يبنون بيها الوطن مثل مما يگولون، الله يجازيهم بكل خير، تعبوا من گدما ساوموا الصينيين على السعر. وبعد ان انتهت المفاوضات واتفقوا على الشروط والسعر، گاللهم أبو المعمل هسه انتهينا يالهبينا نروح نتعشى، وراح أوديكم لأشهر مطعم عدنا ببكين.
طبوا يمشون بصفة ويباوعون، انبهروا بالديكورات والترتيبات،لكنهم گبل ما يگعدوا سئلوا على الأكل الحلال، ولمن ما لگوه حلال، گلوله يابه ودينه لغير مطعم ووداهم.گولوا تعشوا حلال وتريعوا، وطشوا بذاك الليل.والصيني الكافر وبعد ما باع المكاين وحَطْ بحساب كل واحد منهم المقسوم من فروقات الأسعار إنحمق، وكتب وگال أتعجب من إلي يدفعوني للغش لتقليل الكلفة حتى ياخذون الفرق، وما حسبوه حرام، ولمن وصلوا للأكل، استحرموا ياكلون إلا الحلال.شاكر يختم حچية يگول هذا الصيني الغشيم ليش متعجب، تعال دنّشَوفكْ العجب.عدنا الناس تبوك وإتخَمُسْ.تصلي وتغش. تحج وتزني..و.. بيع واستحمد ربك!!