المقدم أبو مشتاق حسبتهَ تعَجِبْ، لام ربعهَ البارحة بالليل وگاعد يريد يحچيلهم سالفته ويه السيطرة العسكرية بالكاظمية وگبل مابدا يحچي غص من الضحك بحيث عيونه گامت إتدّمع، وبعد ماشرب گلاص ماي گال:اجيت ويه المره بسيارتنا، وگفت بالنقطة چان السرة طويل وازدحام. گتلها وآني مترهي أم مشتاق خليچ بالسيارة آني راح احچي ويه الولد حتى نعبر بدون سره. بعدها صحت على
الشرطي وإجاني گتلّهَ آني مقدم بوزارة الدفاع وهاي هويتي أريدأمر اشويه مستعجل.باوعني بعين وحده وجاوب:إصعد لسيارتك وإبقى بالسرة، حالك حال الغير، والواگفين بالسرة تلگاهم نصهم عسكر ويجوز أعلى من رتبتك.طبگت بالسرة ونزلت من السيارة أتمشى عليه، ولمن وصلته گتله:يمعود أبو المروه تره آني پوزت گدام مرتي، وگتلها لا تدير ينبال هسه نفوت بلا سره، إبختك لا تخزيني.ضحك الشرطي وگلي يلا مر هاي لخاطر مرتك.تدرون القذافي من سوه ثورته چان ملازم أول، وحسن سريع سوى انقلاب عدنا عام ١٩٦٣ بالرشيد وهو عريف، وكيم ايلسونغ من قاد كوريا الشمالية وحكمها كان رائد. وجمال عبدالناصر سوّهَ الثورة وهو مقدم. ووو.رحمة الله على والدين الشاعر الي گال:عَنّبَرْ زَرعت الگاع شو خَضّر دنانْ مَدري البزر بيه صوچمدري البخت خان.