من واحد يگول يمعودين إفصلوا الدين عن السياسة، لأن الأخيرة بيها مناورة وچذب والدين أمانة وصدق يزعلون. وإذا گال لأهل الدين من تحكمون على كيفكم لا تغيّرون كلشي، وتبدون تحللون وتحرمون براحتكم، مو بس يزعلون يكفروه، ويدخلوه للنار وهو بعده بالدنيا كلشي ما شايف منها.وطبعاً الى دا نشوفه بهذا الزمن أهل الدين گاموا يتدخلون بكلشي،بالزراعة والصناعة وفتحوا أسواق ومستشفيات وجامعات،وصاروا ينافسون الدولة بمهامها الأساسية وواجباتها الرسمية
وغير الرسمية، وآخرها خطيب جمعة ومشارك بالحكم، عاف مصايبنا كلها وراح يحچي بحرگه عن آثار السياحة بالأهوار بعدما صارت تراث عالمي، وگال هاي راح تسبب حصول علاقات غير أخلاقية.شيخنا لا توگف يم الاخلاق حسب ما تشوفها انت وتفهمها انت،لأن كلشي تغير بهاي الدنيا الي احنا نعيش بيها مو لوحدنا، وهذا مو زمان تسد بيه بابك وتستر على نفسك، العالم يتغير ويتطور ويغيرنا غصباً عنا. وشيخنا الله يوفقك بس خلي بالك يم اشوية حقائق تبينلك ترى الدين من يستخدموه اهل السياسة هو الي يسببفساد العلاقات الأخلاقية، مو السياحة، ويا ريت ترجع ويانه ليورها شوية وتتذكر الدعارة اشگد زادت بالبلاد بعد الحملة الايمانية بذاك النظام، واشگد تضاعفتْ من دخل الدين بالسياسة،واتضاعف وياها الفساد والخيانة والچذب والسرقة والاستغلال،وما بقت أخلاق ينخاف عليها، لأن المشكلة مولانا مو بتطبيقات الدين، وانما بالفقر والجوع الي نسانه قيمة الدين. الله وكيلك خلصونا من الفقر وما راح نسوي قارش وارش لا بالأهوار ولابغير مكان.