بذيچ السنة زار العراق وزير الدفاع الكندي. وكندا من الدول الچبيرة، مرتبة ومتطورة وعدها مشاركة بقوات التحالف الدولي لمقاتلة داعش من سنة ٢٠١٤ بقوات خاصة للمساندة والتدريب،وطلعات جوية لقصف أهداف ارهابية. الوزير مالنا وكبار الوزارة انتظروه بالمطار، وأكثرهم ما يعرفوه من گبل لأن چان تعيينه جديد، فكل واحد منهم مخلي لهذا الوزير بعقله فد صورة:أشگر وعيونه خضر واخدوده متفحة وتر دم.وصلت طيارة السيد الوزير، ولمن نزل منها تفاجأوا بيه شكله وهيئته هندي، ومو بس هاي لابس عمامة السيخ التقليدية، يعني الرجل يا إما مهاجر واذا كلش أبوه مهاجر، لكن صار وتم اختيارهَ وزير لأنه أفضل من غيره الشگر والسمر وجماعة الچين وماچين بهواي.فالسيد اللواء واحد المستقبلين سأل صاحبه هم لواء وگله بله بروح أبوك هذا لو عدنا چان خلوه رئيس قسم.رد عليه وگال:وداعتك حتى لو قابلين بيه مدير شعبة ومعينيه, چان اشتغلت عليه التقارير من كل صفحة، وبدت التشكيكات بيه وباهله الى سابع ظهر.
فرجع جاوبه، ليش انروح بعيد فن الواحد يرشحله مدير عام مومن الكتلة، أويلي اشراح يطلع عليه حچي إذا من غير ملّة،واشراح تنرفع عليه تقارير، تطلعه من بيت هيبو.لا ويگلولك احنه ما نفرق الا بالتقوى.