حلو من ربعنا يبدون يسولفون ويگولون احنه أهل الحضارة،ويرجعون ليوره الاف السنين ويذكرون أنو حضارتنا عمرها (٧)تالاف سنة.
وبعد ما واحدهم يخلصْ حچايته عن حضارته الي ما لامس منها شي ولا عايش بيها، ينفش ريشة عبالك علي شيش. ما يسأل ولاهمه يسألون نفسهم شني فايدة الحضارة الي ما خلتهم يصنعون بايسكل أبو ثلث چروخ؟ ولا بقت بگلوبهم رحمة على بعضهم البعض ولا گدرت تعيشهم بأمان، أشو گضوها: حروب وتمردات وانقلابات وامزامط وعداوات وتجاوزات.حضارة أم السبع تالاف سنة ما مكنتهم يربحون حرب وحده ويه اسرائيل أم السبعين سنة.ما غيرت بنفوسهم ولا بدلت بأخلاقهم، بقتهم على حالهم بدوي عيشون على الفرهود، معنى مشوه للحضارة تأكدها قصة أم محمد:أم محمد مره طيبه، شافت ابن أخوها متضايق بعيشته ويه أهلةببيت بيه غرفة وحده، فگلتله يمه تعال اگعد بالمشتمل مالتي وآني أروح أگعد ويه محمد، بيته چبير وايجاره معقول، باس ايدها وگاللها بيتك بعيني واشوكت ما تريديه راح تلگيه مثل ما استلمته وأحسن، وبنفس اليوم شال. ليش ما محمد الله وفقه وطلعتله هجرة لأمريكا، فراحت على ابن أخوها وگلتله عمه أخوك محمد سافر والبيت چبير علي وايجاره هواي، فأريد أرجع للمشتمل. بدا يماطل ويتحجج راحت على عمامه نختهم، وره (٦) أشهر شال،ومن شال ما خلى باب ما شالعها ولا بلك ما شايله ولا بوري مامالصه، رجع بديوي يدور غلب وثار.