أگول الواحد بهاي الديرة، وأقصد بيها ديرتنه العراقية والعربية،يروح يمين يطلع شمال چنه يرجع لنفس النقطة.وبهاي الديرة العجيبة ياما صارت ثورات وانقلابات وحروب وتغييرات، كلها ترجعنه لنفس النقطة.وتبين قصة اللف والدوران بديرتنا بدت من سنة ١٩٥٨ الي تغيربيها نظام الحكم تغيير رجعْ البلاد الى ما قبل تأسيس الدولة يعني لنفس النقطة.
راحة ماكو استقرار ماكو تطور وبناء ماكو، نقطة خلت البعض من الناس تگول إحنه شعب داعي علينا الامام الحسين لأن إحنة الي جبناه، وبايعناه وصرنه ويه عدوه عليه وقتلناه، وبعد مقتله رجعنه لنفس النقطة.وأكو ناس گالت هاي حوبة العائلة المالكة الي كتلناها ونسوانها شايله القرآن فوگ راسها، وكل حوبة ترجعنا لنفس النقطة.وأكو ناس آخرين تگلك مؤامرة دولية أهدافها ترجعنه لنفس النقطة. وتأكد گولها هذا بتسليط داعش علينا، چم ألف لملوم منكل العالم وين العدواني والمختل يلعبون بينا وبالعالم طوبه،ويرجعونة ليوره حتى قبل ذيچ النقطة.وبعد داعش شكو، الله أعلم، لازم أكو شي ثگيل، يسووه كبارالعالم لعبة أو متاهة يدخلونا بيها، نبقى نلوب، وتاليها نطلع من المكان الي همه يريدوه ولنفس النقطة.زين شيريدون، ما نعرف، والجاهل الي ما يعرف ما راح يلگه حل، ويبقى العمر كله يدور مثل حصان الناعور على نفس النقطة.