طلع السيد محافظ البنك المركزي على فضائية الحرة بوكت بيه أزمة سيوله بالبلد وحچه حچي چان مرتّبْ وما عليه أي شائبة ولاغبار، وگال:أكو (٣٠) ترليون دينار عراقي نقد برة البنوك يعني بالبيوت وبالمحلات وبصرر جوه الدواشگ والمخدات.وأكد حسب حچية لو أصحابها يودعوها بالبنوك چان تسوي حركة اقتصادية چبيرة وتنعش السوگ، وأصلاً حتى الحكومة بعدما تحتاج تقترض من بره وتتحمل فوائد ورهن الاقتصاد عشرات السنين.سيدنا ما نگلكم رجعوا ثقة المواطن بالبنوك المفقودة أصلاً حتى الناس تودع فلوسها، ولا ننصحكم تسوون توعية شعبية بأهمية ايداع الفلوس بالبنوك. ولا ننبهكم على لزوم ارجاع الفلوس المودعة بالبنوك اشوكت ما يريدون أصحابها يرجعوها وبساع مو تقسطوها أقساط.لكن الي نريد نگوله وبحسرة خلي البنوگ الحكومية تسهل فتح حساب للمواطن الي يشوف الضيم حتى يفتح وهذا شي أسهل منهماكو.وافتحوا حساب للمتقاعد الي يتحول راتبه للبنك بحيث يروح الراتب لهذا الحساب كل راس شهر، ويسحب منها اشوكت مايريد مثل ما موجود بالصومال وجيبوتي وبالواق واق.
سيدنا وآخر نصيحة قبل ما نروح نركض حتى نودع فلوسنا بالبنوك وننعش الاقتصاد ونفيد ونستفيد، بروح أبوك مر على البنوك الساعة ٨ ونص، وحثهم يشتغلون شغل بنوگ مو فاتحين بسطيات للريوگ.