البرلمان مرات يخيوّز، لا والله هواي يخيّوز، ووحده من حالات التخيوز مالته عقد جلستين برلمانية بغياب الرئيس، والظاهرصاير بيها تصويت، فأكوا أعضاء اشتكوا عند المحكمة الاتحادية العليا وگالوا بشكواهم هذا مخالف للقانون.والمحكمة من جهتها أجلت الحكم بالقضية عدة مرات.وحقها تأجل لأن ينرادلها وكت حتى تفرزن الصدگ من الچذب،وتشوف الحضور، وتباوع السيديات.وتسمع من الكبار والزغار ومن كل الأطراف آرائهم، وشيگول ونيعني جيب ليل واخذ عتابه.سيد كامل يگول ذوله البرلمانيين لو يخلون الله والعراق وظروفه بين عيونهم ويفضون خلافاتهم على المناصب ورئاسة الكتل بيناتهم، ويدگون دگة مردانه ويسوون كتلة معارضة وبليا هذ يالدعاوي والمحاكم.لأن بكل برلمان من برلمانات العالم الديمقراطي لازم أكو كتلة برلمانية هي الي تشكل الحكومة وكتلة أو جماعة تعارض.وهيچ تمشي السفينه وتوصل للجرف بسلام.
ويكمل السيد حچيه ويگول لكن راح تلاگيهم مشكله مو هينه، ومنسألوه يمعود شني المشكلة جاوبهم وگال:راح يحتاجون رئيس لكتلتهم، ويوم يگعدون يختاروه أكيد تنلاص ويجوز يتفلشون، لأن كلها راح تگول آني الرئيس، وآني ال يأستحق الرئاسة يعني يطلعون نص الكتلة أبو جاسم. هاي إشلون راح تنحل.