كل موسم حج وبكل سنة، خطية المواطن العراقي ينبط چبد هو عينه تبقى تبحلق على المسؤول لا يروح ياخذه مكانه.ومن جهته المسؤول مشغول اشلون يروح للحج من غير قرعه حتى لو أخذ مكان غيره، ولو چان رايح بالسنة الي فاتت واليگبلها عدة مرات.
هنا ما نريد نگول الحجة الي يريدها المسؤول ويسعى الها راحتكون على حساب الحكومة ونشيل غيبته الرجال، لأن المسؤول الله موفقه من الناحية المالية، وما محتاج الحكومة ولا فلوسها. لكن الي نريد نگوله ونسأل عليه مثل ما غيرنه يسأل ويدور على إجابات عنه وعليه:ليش المسؤول يستهين بعقول الناس ومشاعرهم؟ليش ما يحسب حساب الوادم الي كبرت بالعمر ودا تدور فرصه حتى تروح بيها للحج ويحققون حلمهم بالحج الي طال هواي؟إشراح يصير لو مخلي حجته الثانية لو الثالثة هاي للسنة الجاية،هم يداري خاطر ربعه الي يريدون يحجون، وهم يقَنعْ الجمهورانه مخلص وخوش مسؤول ما يستغل منصبه وياخذ مكان واحدمستحق، وهم وياها يمحي الذنوب الي راح يجمعها منا للسنةالجايه.لا وفوگاها مسؤولنا من يوصل الى ببيت الله، يجيب ويدز بالصور والفديوهات الي يگول بيها دا أندعيلكم حتى يذكر بالحيف الي أصاب الناس الي إنوخذ سراها.يا جماعه حقه أبو المثل من گال شتحطلها وتطيب.