عراقي من أهل بغداد حِلَمْ چنه عايش بقصر على دجله، وچن العراقيين بآخر مقياس سعادة عالمي طلعوا الشعب الأسعد بالعالم،وچن كل المشاكل انحلت بقدرة قادر:الحكومة صارت تكنوقراط أصلي وبعد ما تفوتها فايته، وقلصت الفجوة التقنية مع الغرب وتفوقت على إسرائيل.البرلمان لغى امتيازاته وزاد نشاطاته وأنهى المحاصصة، وآخر قانون شرعه الرفق بالحيوان في هذا الزمان.
وزارة الكهرباء أسست شركة عالمية تفوقت على سيمنس وجنرال الكترك، حلت المشكلة برمشة عين وزيدت الانتاج عشرة أمبير،اقترح المعالي تصديرها لإسرائيل جوه العبايه بضعف السعر المحدد للمولدات.بغداد صارت أنضف من زيورخ بسويسرا. وتعليمنا ينضرب بيه المثل وعالمنا الجليل الخبصاوي إكتشف زرف بالثقب الأسود غيّرْ نظرية خلق الكون، وزميله السكتاوي أثبت أن عذاب القبر يشمل الكفار فقط. الاقتصاد طفر طفرة إبن رعين وبعد ما نحتاج النفط وتنفذت خطة كنز الفلوس للجيل المتعوس. والبطل منگاش من طويريج وبعد ما وگع الطيارة بالبرنو اخترع آلة لتكثيف البخار المصاحب لدخان النرگيلة وتحويله الى مطر، وضخ الزايدمنه شلع دَيَنْ لتركيا وايران.فز أخونا من الحلم على صوت المذيع يگول الطيارات الإسرائيليةدمرت ميناء الحديدة باليمن. صفگ ايد بإيد وصاح چانت عايزه وتمت!.