كلمن يكللكم بدولة العراق العلية الي مخليه مئات المستشارين وتنطيهم رواتب وامتيازات رئاسية، ومسؤوليها الي عدهم مستشارين، يستشيرون أحد من ذولة المستشارين، گلولة:چذب وستين چذب.واذا إجاكم واحد چان ما چان، وگال لكم أكو مسؤول إسمه فلان إبنفلان أخذ بمشورة فلان هم گللوله:چذب مصفط فوگ چذب.واذا گاللكم، لا آني بهاي عيني الي باچر ياكلها الدود شفت المسؤول الفلاني سأل المستشار الفلاني، وأخذ برأيه، الي چانب الأصل مو على مرامه، خِشّوا بعينه وانطوهياه بالوجه وگلوله:چذب بچذب.
لأن الاستشارة والأخذ بالرأي الصحيح المخالف للرأي الشخصي للأعلى والمسؤول والأب والسيد الريس، هي:ثقافة ونضج اجتماعي لحد الآن ما وصلناها، والى أن نوصلها جيب ليل واخذ عتابه، لأن لازم:تتغير نظرتنا الى أنفسنا والى الناس من حوالينا والى المسؤولية كقيمة اجتماعية.ونزيل هذا الزنجار بأدمغتنا، ويبطل واحدنا يشوف نفسه وبس.ولازم اذا واحد الله وفقه وصار مسؤول صدفة وبجرة قلم وأحدقَدَملهَ مشوره تختلف عن ما يريده، كون ما يأخذ منه موقف ويگوم يشوف عزرائيل ولا يشوفه.