اذا أنت مو دكتور فالي راح يقدمك بالفضائية وبأي برنامج گوه يسويك دكتور، وانت هم تگول يالله، شكو بيها قابل بقت عليَّ، مو بالآلاف جابوا دكتوراه من الجامعات الإسلامية بلبنان، وغيرها بمتين دولار حتى صار نص الشعب العراقي دكاتره.واذا تلبسلك فد عگال زين وغترة بيضه منشاية على جهةالغربية، لو يشماغ وعگال شّد على الواجهة الجنوبية هم يوگفولك ويگلولك تفضل شيخ، وأنت هم تكيف، وتگول بگلبك إي قابل شيوخ هذا الوكت أحسن مني، أشو صاروا كل عشرة بفلس، حتى
بعد محد يسأل على أصلهم، ولا فصلهم، وصار نص الشعب مالنا شيوخ.واذا ما لگولك لقب وانت طالع بمؤتمر لو بفضائية، گول خبير أمني، وابدي رَهُمْ بكيفك، وشكوا زيِّد عدد الخبراء الأمنيين لأن مطلوب يصير عدد خبرائنا الأمنيين أكثر من عدد ضباطنا الييشتغلون بالأمن.وإذا اقترحوا عليك تگول محلل سياسي، لا توافق، لأن سوگه مواگف، ونزل عددهم بهاي الأيام حتى صفه ربع العراق محللين سياسيين.أبو رائد يگول:لعد اذا عدنه هلگد دكاترة وخبراء ومحللين، ومسؤولين، متفهمونه لعد ليش باقين غرگانين بمشاكلنا.وليش حكوماتنا كلها تحچي وتدور على تكنوقراط، يمكن يريدونتكنوقراط شرعي على الگدر.