يگولون الحكومة تاخذ گمرك على البضائع المستوردة ومن أيجهة كانت وهاي (خوش).ويگولون إجتها أيام سوت ساحة للوريات وبضائعها الي تجي من الاقليم وتركيا قريب من الخالص، حتى يسوون التسوية الگمرگية(هم خوش)، ليش لا، حبة من إهنا وحبة من إهناك تترس الجدرالي فرغوه أولاد الحرام.لكن الي مو خوش هي السيطرة المنصوبة فوگ من الحسينية والي بقى بيها نقيب فترة مو قليلة، والنقيب چان بوكتها حادسنونة. يدخل السيارة المليانه بضائع لبغداد بـ(١٥٠) ألف دينار،من غير ما تدفع گمرگ.تسعيرة ثابتة، ما تقبل نقاش.لذلك أبو جواد سايق تريلة على الخط، يگول:أنصح أخوتي السواق المحملين ببضايع تتگمرگ نصيحة لله بالله،أن لا يدفعون گمرك بساحة الخالص، وبدا نصيحته: تعال گبل لهاي السيطرة (فوگ الحسينية) ومن تتقرب الها راح يسألك الشرطي وين الوَصلْ مال التخليص الگمرگي؟لا تدير بال ولا تتردد، گله أخلص إهنا، راح يضحك بوجهك ويوديك للنقيب، على طول طلع إفلوسك حتى لا تتأخر وتأخر أخوتك المسلمين، مو احسن ما تنطيها گمرگ بلا معنى.ها وخافـ واحد يگلك انت ساهمت بتخريب اقتصاد البلاد، سوگه ببوكس گبل، أو آتــ .. ل بوجهه، تراه هذا عميل، لو وعلماني كافر ما يعرف الله، لو من جماعة العهد البائد، وذوله كلهم ما الهمحق يحچون.