گبل فترة خابر إبراهيم صديق گلبه محروگ على الوطن، وبده يسولف بالتلفون، سالفه وره سالفه وبآخر سالفه گال:تره الأمور مخربطة والجاي الله الي يستر منه.گتله يمعود گول غيرها.رد عليَّ باستهزاء وگال اسمعني للآخر وانت احكم بنفسك، وبدا يحچي:بيت كاظم ويسميه كويظم جيران بيت سالم ويدلعوه سويلم عايشين متصافين وما بيناتهم شي.
طلع من بيت كويظم جريذي، شافته چنة بيت سويلم حامل بشهرها السابع، وهي دا تكنس بالباب خافت منه وتزحلگت يم العتبة وطرحت.إجوي عشيرة بيت سويلم گاوموا بيت كويظم گلولهم:جريذكم موت ابنا.يمعودين هو جريدي. ما كو فايده. ما جازوا الا أخذوا فصل خمسين مليون.راحت أيام وإجتي أيام، ضاج الجريذي بعد ما يتحمل الحر، طلع يشتم هوا، لحگته بزونة بيت سويلم، أكلته بالدقيقة، هدوا عشيرة بيت كويظم، گاوموا بيت سويلم. گالولهم:بزونتكم أكلت اجريذينه.يابه هي بزونه، واحنا جيران. وهم ما طلعوا الا أخذوا الفصل سبعين مليون.وبعد ما كمل إبراهيم حچايته تنحنح وگال: ها خويه شتگول. گلتله ذكرتني حچايتك بقصيدة موفق مهدي الي يگول بيها (الجاي بعدأنكس).