التفجيرات والاضطرابات الي صارت بالعراق من بعد ٢٠٠٣ولليوم وراها أصلاً العرب والمسلمين، وطبعاً أكو دول أخرى مستفيدين. ولو واحد يتبعها زين راح يشوف المسؤولين السوريين أخذوا من عدنه ورچ معسكرات تدريب ونقل فلوس ومتطوعين جاهزين، المهم عدهم يورطون الأمريكان. وأهل الجزيرة والخليج أخذوا ورچ فلوس وتحريض وأدعية بالجوامع ومتطوعين
متحمسين لتطبيق الخلافة بأراضينا، والي يهمهم يشمتون ويرضون الأمريكان. والأتراك أخذوا ورچ تغطية وطريق عبور ومكان علاج وراحة وأسلحة ومتفجرات، المهم عدهم ياخذولهم مكان ينافس الأمريكان. وإيران هم أخذت ورچ لعب على الحبلين مكان ختله لبعض القيادات، وتنفيذ عمليات تفصال مثل ما تريد وتشكيل مليشيات، المهم الها تبعد عن أراضيها الخطر وتورط الأمريكان. وعرب الشمال الأفريقي ما قصروا بالمتطوعين،وذوله خطيه همهم يتعشون ويه الرسول، يعني مو يم الأمريكان.خصم الحچي كأن الروح عند العرب والمسلمين رخيصة،وحكامهم من غير استثناء يسترخصون الروح على مود يبقون بالحكم ويستمرون، لذلك نشوف أغلبهم خلوا الموت هو العقاب الأقرب والأسهل يعني: الي يحچي ضدهم يموتوه، والي يزن يبديرتهم يموتوه، والي يشربله ربع عرگ بگاعهم يريدون يموتوه،والي من غير ملتهم إذا عطس يتمنون يموتوه. ما يدرون لهذاالموت ثمن هو الخوف واللجوء للأجنبي لأغراض الحماية لتقليل الخوف، وما يدرون للفعل الإرهابي الي يدعموه ولأي سبب كان،ارتداد مثل ما صار بسوريا مع الأسف وبإيران وبدول أفريقيا وبتركيا داخل حدودها وخارج الحدود.