هو انت محافظ راتبك مبين ومعروف لو تبقى بالخدمة الحكومية عشرين سنه بدون تخيوز ما تگدر تشتري هيچ سيارة (BMW)غالية ولا تبني هيچي بيت نفه، وتلبس مرتك معاضد ذهب وحجول.وإذا تگول هاي السيارة الي ماكو منها چم وحده، حكومية. فما معقوله الحكومة وهي كل النهار والليل تحچي على ترشيد الانفاق وخايفه اشلون تنطي رواتب الي تجيب وتعين بيهم اذا نزلت أسعار النفط لا سامح الله.أما إذا گلت وقريت واعترفت هي إجتك هديه من مستثمر خطية.أو من دولة خليجية.أو من جارة غنية.وتگول مثل ما يگول اخوانا المصريين بامثالهم الشعبية، ان الرسول قبل الهدية، فهاي ما عليها عتب ولا زعل أو انتقاد ومنحقك تستعملها اشلون ما تريد، حتى لو خليت عليها علم العراق وايران بكيفك.وحقك يبقى ساري المفعول، ومحد يگدر يلومك لا من قريب ولامن بعيد حتى لو گعدت الرئيس الإيراني الي جايكم ضيف للبصرة، بصفك مثل ما تريد، وفريته بشوارع المحافظة الي تريد.بس يرحم والديك:بلا هاي الخفية والانبطاحية.
وفدوه لعينك لا تروح زايد بعد لأنا خايفين على السياسيين الإيرانيين لا تروحون تفسدوهم وهمه الي باقين ذخر للأمةالاسلامية.وآخر دعوانا أن الله يزيدكم من نعيمه ويبارك بجهودكم لخدمة الدين والدولة.