جماعتنه أقصد السياسيين الي بالحكم والي گاعدين يناضلون من أجل الحكم لازم يختلفون، وإذا ما لگوا شي يختلفون عليه،يروحون واحد يتصنت على الثاني بلكت يلگاله زله عليها يختلفون.وآخر إختلاف طلعت ريحته بيناتهم هو على إدارة جهاز المخابرات يريدون يوخرون إدارته الحالية الي ماخذها على عاتقه رئيس الوزراء، ويستلمه واحد مرصرص من الاطار.والسائل يسأل ومن حقه يسأل عود ليش هذا الإصرار على استلام هذا الجهاز من سياسي ما يعرف كلشي بشغل المخابرات؟أهل الاختصاص والي متابعين الموضوع يگولون هي وحده من اثنين:لو الجهة الي كاتله نفسها على استلام إدارته تدري بنفسها تخيوزْ هواي، وتعرف كلش زين هي تنام بالليل مكشفه، وتحلم أشكال وأرناگ، وتريد من يغطيها ويستر عليها من العذال.لو هي، وكل جماعتها عارفين الجهاز لحد الآن يشتغل بقدرمقبول من الاحتراف وبقوة دفع مهنية زينه، ويريدون باستلامهم إدارته يخربوه فد نوب مثل ما خربوا كثير من الإدارات، حتى
يمَشْون مشاريع دول ويطبلون لأفكارها، ويسمحولها تلعب بالساحة مثل ما تشتهي وتريد.الصدگ لو همه مسلمين من صدگ وحريصين ووطنيين ويفتهمون چان سنوا قوانين تحتم إدارة كل الأجهزة العسكريةوالأمنية والاستخبارية من مهنيين مستقلين ويخلصون من الخلافات ودوخة الراس.