لمن نور زهير عراب سرقة القرن قشمر الأمة وطلع بكفالة وگرنتي سفر يفتر بين البلدان على أساس يرجع فلوس البوگة اليلحد الآن الدولة العلية ما وصلت لطينها الحري وگالت اشگد، ولافسرت ليش دا يصعد الرقم حتى زاد عن (١٠) مليار دولار؟ولمن السيد نور لعب لعبته مال حادث اصطدام سيارة الأجرة الراكب بيها بلبنان واصابته بيها، حتى لا يجي للمحكمة ببغداد.أشو بليلة گمرية طلع السيد المعالي لوزارة المالية السابق، وشاور المركز الخبري العراقي وگاللهم تره أخونا نور عنده بيت بشارع الاميرات، وبهذا البيت أكو قاصة، وهاي القاصة أكثر قاصةمحصنة بالشرق الأوسط، ولا يمكن فتحها أو كسرها أو زرفها حتى من الأمريكان، ولا يمكن صهرها حتى لو تجيبلها كل بريمزات العالم لأن تحتاج درجة حرارة أكثر من (٢٩٠٠)درجة.السيد المعالي ما قصر، وصفها وصف تمام التمام عبالك شايفهاوگال درعها الخارجي مصمم ضد كل أنواع الضربات والقذائف لأنه مبني بمواد خاصة ويتوقع بيها اكثر من مليارين دولار زايدفد ٥٠ طن ذهب، ويأكد أن موجوداتها هاي هي لجماعة سياسية بينهم واحد چبير.
أبو سليمان يگول عبالك المعالي خله القصة ناقصة، تحتاج مُخرِج يجينا مخصوص من هوليود يسويها فلم (قاصة نور زهيرو الأربعين حرامي).بس كون يخليله نهايته تكون القاصة تنفتح الها ولنفسها بدعاء سكنة شارع الأميرات.