گبل ومن چان الطب قليل والمعرفة قليله الي يتخبل يربطوه بشباچ الامام لو يودوه للسيد يتفل بحلگه لو يسويله سحر، لو يعفوه يفتر بالشوارع، تركض وراه الجهال ومحد يديره بال. والمره اليتخرب ويه رجلها، لو العمة تخرب وياها، تروح للساحر يبطل
العمل الي سوته العمة ويسويلها عمل جديد مضبوط، يخلي الرجال مالها محبس باصبعها مثل ما تريد.وهاي السوالف من بدا العراق يتقدم اشويه ليگدام، ويتطور بالستينات والسبعينات بدت تقل اشويه بعد اشويه.لكن اشو بهذا الوكت رجعت أقوى من گبل وصار الي يمارسوها كلاوچيه وما يستحون أكثر من گبل، ورودها من كل الشرائح والطبقات، ومن جميع الأعمار، زلم ونسوان.والغريب گاموا يروحولها موظفين وموظفات وأصحاب شهادات.والأغرب بعد وحده من الي راحن بهذا الشهر بغدادية عدهادكتوراه وعدها مشكلة ويه رجلها عنها تگول:دا أشوفه يلعب بذيله وأخاف يتزوج عليَّ وأدري بيه يسويها منصار عنده فلوس، فودتها صديقتها لواحد سحار بالبياع، شافها وطش گدامه چم حصوايه وبعد ما باوع عليهم صفن وگال:معمولج عمل ولازم أسويلج عمل، بس هذا العمل ما يصير الاعلى نگاسه، يعني .... هنا الأخت صحت وگالت لا والله بطلت لأن شفتها حرام.. لعد إشگد احنه بخير وملتزمين بالحلال والحرام.