عرفنه بهذا الوكت الاغبر واحد يبوگ ذهب مرته من الفاتيه. لأنه حقود ويريد يحرگ گلبها.البوگة صايره ويمكن تصير.وآخر مدمن مخدرات أو مدمن كحول أو على القمار يبوگ فلوس ضامتهن الحبيّبة بجيب سري بدوشگها العزيز ومخيطته بخيط تفته، لأنه بطل شغل أو خسر بالقمار ويريد يرجع حله.المسألة صايره ويجوز تصير.وثالث مختلف ويه المرية اختلاف واصل للضالين وعدهم جهال،يروح يبوگ جهاله، ويرجع بيهم للعراق، لأن يعرف خلافهم ماتصيرله كل چاره، ويدري كلش زين بديرته الأصلية يضيعون.صارت اكثر من مره ويمكن تصير.لكن رجال يچذب على مرته، ويبوگ الكلية مالتها هاي الي ماصايره ولا يمكن تصير. زين الطبيب الجراح اشلون قبل يشيل كليه من غير موافقة صاحبتها، والمستشفى اشلون قبلت تنام المره عدها وتسوي العملية يمها بدون ما تعرف تفاصيل الحالة والكليةوين تروح. والمشتري لهاي الكلية اشلون اشتراها وهي مبيوگة،ما حسب حساب رب العالمين يجوز يعطلها بعد الزرع لانهاحرام، وتروح فلوسه بالشط.هاي لو بزمان گبل چان الي يرتكب مثل هيچ فعل شنيع انعدم بيومه، بس بهذا الزمن ولمن وصلت الريحة للراس اشتعدم واحداثنين عشره.