العراق غرگان من شماله الى جنوبه بوحل التخلف والمشاكل.شبابه أو هواي من شبابه طامسين بالمخدرات والمكسرات.التعليم تخلف مراحل ومراحل.الصحة العامة تردت مستوياتها فرد نوب.كل هاي والبرلمانيين عبالك ما دايرين بال، وبدل ما يديرون باليخلقون مشاكل يزيدون الطين بلّه، أو بدل ما يروحون يكحلوها إنوب يعموها، والا بربكم هسه وكتها يطلع واحد من البرلمان ويدفع باتجاه تعديل قانون الأحوال الشخصية، هو هسه محلها التركيز على المذهب بالقوانين، وتقديم المخول الشرعي على القضاء بالعقود، وهسه وكتها نرجع قرون لتحديد سن البلوغ ونوصله بالگوه تسع سنين. زين ما تدرون البشرية تقدمت وقدمت آلاف الدراسات عن البلوغ والنضج العقلي والبدني، وعرفت بالضبط اشوكت الجسم يكون صالح نفسياً وعضوياً للتزاوج والانجاب.هسه انتم تريدون تمشون على رؤيتكم بالتزويج والتوريث والحضانة هاي مسألة تخصكم، خالفوا بيها العالم محد يگلكم لا.بس لا تسووها قانون وتفرضوها على غيركم من باقي المذاهب والأقوام مو راح تكفروهم بعيشتهم وتخلوهم يطفشون.
يا جماعة اشوية كلفوا نفسكم وارجعوا للعلم وشوفوه شيگول، لاتچلبيون بالي گالوه أجدادكم من چانوا ما يفكون الخط، ثم الي چان يصلح لزمانهم، يجوز ما يصلح لزمانكم. يمعودين هدو اللعب اشوية، حلولنا چم مشكله حتى نرجع ننتخبكم، لا تذبون فوگ النارحطب، وتزيدون القهر قهرين.