أكو من عدنه خطية دوم يسألون بله عليكم يا أهل الرحم اشلون راح نطلَعْ من هاي الوحلة؟وأكو من ينبِشْ ويِبحوش، ويجوز قبل الغرغرة بشويّه يرجع يسأل اشلون نحل مشكلة الكهرباء الي صارلها (٢٢) سنه ما محلولة؟واشلون نخلص من مشكلة الدولار الي صارلها أكثر من أربعين سنة معصلگة.
واشلون نتعامل ويه الاتراك الي دخلوا عشرات الكيلو مترات داخل حدود الوطن، واشلون نتفاهم ويه ايران الي نفذت بكل أراضي الوطن؟وأكو وهمه الأكثرية عارفين وجود مشكلة بعدد الموظفين اضعاف ما تحتاجه دوائر الدولة ما الها حل.وفاهمين تضخم الرتب بالدفاع والداخلية الي ما ينفع الها كل حل.ودارين بالتجهيل المتعمد لأبناء الوسط والجنوب الي ما يصيرله أي حل.وشايفين بعيونهم التجاوز على أملاك الدولة وفساد أهل الدولة،وعهر سياسيين مشاركين بحكم الدولة، ورگص بعض شيوخ العشائر وضحكم على الدولة، وكثر العصابات المنتشرة بصفوف الدولة، وساكتين وكأنهم ما يريدون حل.اشلون يلگون حل؟ومنو الي يفكر ويلگه الحل إذا بهذا الصيف الحنان واحد يتعنه للمگبره شايل قالب ثلج على چتفه ويحطه على گبر ابوه حتى يبرد المرحوم، وما يفكر المرحوم نايم جوه متر ونص من الگاع وعليه طن تراب، وكل قطره مي ما توصله، وحتى لو وصلت همراح توصل حاره ويجوز تچويه.