كلها تگول خوالنه الأتراك واصلين قريب دهوك يعني موسعين تواجد جيشهم الي هو بالأصل موجود. وتگول:
بس هاي المرة دايسين بالبطن زايد، وناصبين سيطرات علـى الطريق العام لمدينة دهوك.واحد من بغداد رايح يصيّف يضيف على الي ينگال ويگول:من وگفوا سيارتنا بالسيطرة ما سئلونه مثل ربعنه منين جاين ولوين رايحين، شفناهم جنود مرتبين، متطورين واحدهم واگف يفتش بكامل قيافته، مو مفرع ولا حاط الجگارة صفح بحلگه،وآخر لازم جهاز يفرزن المطلوبين على رسوم الوجه من حزب العمال الكردستاني.ويكمل الرجل حچيه ويگول:هذا مو موضوعنه يفرزنون لو ما يفرزنون، متخليهم عباس يكتل درباس، الي يهمنه آشو ربعنه ساكتين، لا أحد گال هاي تيهانه وماتصير.ولا واحد عتب على الجار وگال تره الجار ما يصير يدوس ببطن جاره.ولا ماحود نوه وگال متفقين احنه نقبل يدوسون، وهمه يوافقون ينطونه مي، أشو خلونه مثل الأطرش بالزفة، نضرب أخماس بأسداس، وندور على السيادة وين.ويختم صاحبنه حچايته ويگول:حتى جبالنا مو مثل باقي الجبال، من شفناها وشافتنه مخليه للعرك هلو نكتل عليها لو ننكتل، وجبالهم هناك يصيفون بهواها العذيبي،ويشتون على ثلجها ويتزحلگون.